Shkelqim Kameri ka dalë sot para gjyqtarit të procedurës paraprake si i dyshuar për dhunimin ndaj 11-vjeçares në Prishtinë, raporton Gazeta Sinjali.
Gjykata Themelore në Prishtinë ka aprovuar kërkesën e Prokurorisë Themelore për caktimin e masës së sigurisë ndaj Kamerit.
Sinjali mëson se 19-vjeçarit i është caktuar masa e paraburgimit në kohëzgjatje prej 30 ditësh.
Kameri ishte i arrestuari i pestë lidhur me rastin, teksa babai i tij ka bërë të ditur për Sinjalin të martën se ka qenë vetë ai i cili e ka dorëzuar djalin e tij në Polici.
Ndërkohë në paraburgim janë dërguar edhe katër të dyshuarit tjerë për rastin e rëndë të dhunimit, ku viktimë është një vajzë e mitur.
Kjo ngjarje e tmerrshme ka ndodhur fillimisht në parkun e Dragodanit në Prishtinë, për të vazhduar më pas në një lokacion tjetër të panjohur.
Ekrem Rexhepi dhe vëllai i tij i mitur, G.Rexhepi, Xh.S., G.J., dhe Shkelqim Kameri, dyshohen se kanë keqtrajtuar seksualisht për rreth shtatë orë një 11-vjeçare.
Sipas dyshimeve të para, fillimisht tre të miturit, G.R., Xh.S. dhe G.J., dhunuan vajzën e mitur, në lagjen Arbëria në Prishtinë, për të shkuar më pas aty edhe 26-vjeçari Ekrem Rexhepi, të cilin e ka thirrur vëllai i tij, G.Rexhepi.
Ekremi po dyshohet se ka shkuar deri aty me veturën e tij ‘PickUp’ dhe e ka marrë vëllain dhe dy të miturit e tjerë të dyshuar bashkë me vajzën që po përjetonte tmerrin. Rrugës, te varrezat dyshohet se ka zbritur G.Rexhepi dhe i mituri Xh.S, ndërsa me Ekremin kishte vazhduar i mituri tjetër G.J.
Ata u larguan nga ai vend për një lokacion tjetër, ku pas një periudhe të shkurtër, Ekremi dyshohet se ka ndaluar veturën dhe e ka dhunuar vajzën e mitur. Për të mos mbaruar me kaq kjo ngjarje makabre, Ekremi dyshohet se më pas e ka thirrur edhe Shkelqimin.
