Me afrimin e fazës së play-off-it për Botërorin 2026, një pyetje po qarkullon gjerësisht mes tifozëve shqiptarë: A mund të përballen Shqipëria dhe Kosova mes tyre? Burime nga federatat dhe analizat e fundit tregojnë se një duel i tillë është shumë pak i mundshëm, por skenarët mbeten të hapur.
Vazot aktuale i largojnë ekipet shqiptare nga njëra-tjetra
Sipas renditjeve të fundit dhe parashikimeve nga ekspertët, si Shqipëria ashtu edhe Kosova pritet të vendosen në Vazon 3 të shortit. Kjo do të thotë se, sipas rregullores së formatit, ekipet e së njëjtës vazë nuk mund të përballen në gjysmëfinale. Në këtë fazë, skuadrat e Vazos 3 do të përballen me ekipet e Vazos 2, duke shmangur automatikisht një duel ballkanik mes Shqipërisë dhe Kosovës.
Megjithatë, mbetet një skenar që i afrohet derbit shqiptar
Analistët lënë të hapur një mundësi të dytë: nëse Shqipëria arrin të ngjitet në Vazon 2, atëherë ekziston mundësia teorike që ajo të ndeshet me Kosovën, e cila do të mbetej në Vazon 3. Ky skenar kërkon lëvizje në renditjen FIFA dhe disa rezultate specifike nga ndeshjet e fundit, çka e bën të vështirë, por jo të pamundur.
Play-off-i do të organizohet në formën e katër mini-grupeve, ku çdo grup përfshin një gjysmëfinale dhe më pas një finale të vetme. Vetëm fituesit e finaleve sigurojnë biletën për në Botëror. Nëse Shqipëria dhe Kosova do të binin në të njëjtin mini-grup, përballja e tyre do të ishte e paevitueshme në njërën nga ndeshjet, por deri tani skenarët matematikorë nuk i favorizojnë.
Në situatën aktuale, probabiliteti që Shqipëria dhe Kosova të takohen në play-off mbetet i ulët, por me disa lëvizje të vogla në renditje dhe një short “kokëfortë”, mund të shfaqet mundësia e parë historike për një duel zyrtar mes dy kombëtareve shqiptare.
