Хрватски пожарникар ја запроси неговата девојка во авион, додека таа била на нејзината работна задача, како стјуардеса.
Пожарникарот Роко Бркљачиќ од Хрватска ѝ предложи брак на стјуардесата на „Кроација ерлајнс“, Лорена Чешковиќ – и таа рече ДА!, соопштија од аеродромот „Фрањо Туѓман“ во Загреб.
Убавиот и уникатен момент се случил вчера утрината, веднаш по слетувањето на летот на „Кроација ерлајнс“ од Сплит, на кој патниците биле сведоци на посебно и неочекувано запросување во авионот.
Во пожарникарско одело, со заштитен шлем на главата, Роко клекнал пред стјуардесата Лорена и ја прашал дали сака да се омажи за него.
– Бев сигурен дека ќе каже да. Само се плашев дека сè нема да оди според планот. Многу ја сакам и ми е мило што ја воодушевив. Колегите беа понервозни од мене. Тие останаа од ноќната смена за да го видат нашето запросување. Дефинитивно не очекуваше ништо, ништо не ѝ беше јасно. Кога таа се согласи, целиот стрес исчезна – изјавил пожарникарот за 24сата.
Таа му одговорила потврдно, а потоа следел бакнеж и силна прегратка. После тоа, се возеле со противпожарно возило по пистата.
– Им честитаме на идните младенци и им посакуваме среќен заеднички лет низ животот – напишаа од Аеродромот.
Фото: Фејсбук
