Камери насекаде, ама логика – никаде. Граѓани масовно реагираат за системот „Безбеден град“, откако почнале да стигнуваат опомени и казни за прекршоци што, според нив, не ги направиле.
Екипа на весникот ВЕЧЕР затекнала граѓани на отворениот пункт во Управата за лични документи во зградата на МТВ, каде луѓето доаѓаат да пријават проблеми.
Еден скопјанец вели дека добил налог дека поминал на црвено на булевар „Јане Сандански“, ама во тој период бил на работа, а колата му била паркирана. Друг граѓанин тврди дека му стигнала опомена за моторче – иако, како што вели, тоа два месеци не било ни поместено од гаража.
Од МВР потврдуваат дека токму ова е најчестата поплака: казна/опомена за возило што лицето не го управувало, или опомена што пристигнала за друго возило.
Само во првиот ден:
-
86 лица лично поднеле барања за промена на податоци (е-маил и телефон)
-
на мејлот [email protected] пристигнале 180 барања, поплаки и известувања
➡️ вкупно над 250 реакции за еден ден
Министерот за внатрешни работи Панче Тошковски изјави дека техничките проблеми ќе се надминат пред системот целосно да стартува – до 1 февруари. Најави и дека се работи на „зелен бран“ на семафорите во Скопје, а порача дека ќе се санкционираат прекршоци како брзо возење, поминување на црвено, но и непрописно паркирање на булеварите.
Тошковски најави и дека од 1 јули камери ќе има низ целата држава, особено на влезовите и излезите од градовите. Според податоци што ги сподели, на Трауматологија има 20% помалку пациенти со повреди од сообраќајки. Како потсетување, Македонија годишно бележи околу 4.000 сообраќајки со повреди, од кои половина се поврзани со брзо возење.
Во новиот Кривичен закон (во собраниска процедура) се предвидуваат и построги мерки: одземање на возило ако возачот е фатен без положен испит, како и во случаи на повторени тешки прекршоци – вклучително и ако по претходна санкција за брзо возење се направи нов прекршок.
