Досегашната истрага нарачана од Католичката црква на Шпанија за сексуална злоупотреба на деца, чии сторители се главно свештеници, идентификувала 1.383 пријави и 2.056 жртви, покажа ревизијата на истрагата.
Резултатите од ревизијата на тековната истрага, предводена од адвокатската канцеларија Кремадес, беа вклучени во извештајот на повеќе од 1.000 страници објавен од Црквата.
Шпанската бискупска конференција процени дека може да се зборува за околу 1.000 случаи на злоупотреба по вкрстено испитување на различни извештаи, кои покажаа дека некои случаи можеби биле разгледувани неколку пати, но призна дека сè уште има многу непријавени случаи.
„Податоците содржани во овој извештај никогаш нема да бидат дефинитивни. Важно е да се запамети дека одредени случаи на злоупотреба се случиле предолго за да излезат на виделина и дека некои жртви не сакаат да зборуваат за тоа“, се вели во соопштението.
Во соопштението се нагласува дека Црквата е подготвена да дознае за сите случаи и да им помогне на настраданите да го надминат и да спречат слични случаи во иднина.
Според истражувањето на омбудсманот за човекови права на Шпанија, речиси секој двесте Шпанци е жртва на сексуална злоупотреба од католички свештеници.
Народниот правобранител испрати извештај до парламентот во кој ја критикува Црквата дека нема целосна соработка во истрагата и дека се обидува да минимизира се.
Шпанската католичка црква, која упати извинување, соопшти дека ќе плати компензација на жртвите на сексуална злоупотреба во случаи кои не биле затворени бидејќи сторителот починал.
Извор. https://fokus.mk/vo-shpanija-identifikuvani-2-056-zhrtvi-na-seksualna-zloupotreba-od-strana-na-sveshtenitsi/
