Телата на девет верници биле извлечени од водите откако биле однесени од надојдената река во Јужноафриканската Република за време на церемонија на крштевање, соопшти денес итната помош.
Вчера пронајдовме две тела, а денеска уште седум“, изјави портпаролот на службата за итни случаи Роберт Мулауџи за дпа. Со оглед на продолжената операција за пребарување и спасување, се очекува тој број да биде уште поголем.
Мулауџи пред новинарите изјави дека 33 верници пристигнале вчера на церемонијата на крштевање на брегот на реката Јукскеи во предградието на Јоханесбург, но ненадејната бура предизвикала силни речни струи и буица.
Во јуни четири лица се удавиле за време на церемониите за крштевање во провинцијата Лимпопо, а за време на Велигден оваа година, одделот за водоснабдување и одводнување издаде посебно предупредување и повика церемонии за крштевање да не се одржуваат на бреговите на реките.
Мулауџи побара од црквите кои сè уште вршат вакви ритуали да бидат посвесни за бурите и буиците кои се вообичаени во летните месеци.
