ЕУ во средата се согласи да усвои нов сет санкции против Русија како одговор на континуираната војна на Москва во Украина.
Санкциите вклучуваат околу 200 лица и субјекти кои им се забранува да соработуваат со компании во ЕУ или да патуваат во Унијата.
„Со овој пакет, преземаме повеќе активности против ентитетите вклучени во заобиколувањето на санкциите, одбранбениот и воениот сектор“, рече шефот за надворешна политика на ЕУ, Жозеп Борел.
Покрај руските фирми, санкциите се насочени и кон кинески компании кои обезбедуваат воена технологија за Русија.
„Мораме да продолжиме да ја деградираме воената машина на Путин“, рече претседателката на Европската комисија Урсула фон дер Лајен.
“Ние, исто така, дополнително го намалуваме пристапот на Русија до беспилотни летала“, рече Лајен.
Украинската војска во средата соопшти дека Русија извршила напади во текот на ноќта со 19 беспилотни летала и повеќе проектили.
Украинското воздухопловство соопшти дека противвоздушната одбрана соборила 13 од 19-те беспилотни летала, како и еден од шесте проектили.
