Министрите за надворешни работи на Европската унија на денешниот состанок во Луксембург се очекува да се договорат за обука на 15.000 украински војници од следниот месец и дополнителни 500 милиони евра за испорака на оружје за Киев. Министрите, исто така, веројатно ќе воведат дополнителни санкции за Иран поради најновото задушување на демонстрантите од страна на Техеран и ќе разговараат за односите на ЕУ со Кина, отворајќи го патот за потенцијално построг став кон Пекинг.
Двајца високи претставници на ЕУ изјавија дека воената обука на украинските војници ќе започне во средината на ноември и ќе се одржи на територијата на ЕУ во Полска и во Германија. Европската унија го поддржува Киев од почетокот на војната со финансиска и воена помош. Министрите за надворешни работи треба да се согласат да додадат дополнителни 500 милиони евра на фондот на ЕУ за оружјето испорачано на Украина, со што вкупната сума наменета за оружје за Киев ќе достигне над 3 милијарди евра. За разлика од претходните транши, дополнителните пари ќе ги покријат и трошоците за поправка и одржување на веќе испорачано оружје во Украина.
