Палестинското движење Хамас за првпат им се извини на жителите на Газа за страдањата предизвикани од војната, во соопштение објавено на својот канал Телеграм.
Палестинското исламистичко движење се извинува, како што се наведува во синоќешното соопштение, за тешкотиите предизвикани од војната против израелската армија, која трае речиси шест месеци.
Во оваа прилика Хамас ја повтори желбата за продолжување на војната, наведувајќи дека таа мора да овозможи постигнување „победа и слобода“ за Палестинците.
Хамас испрати „порака за благодарност до луѓето“ од Појасот Газа чија „исцрпеност“ ја препознава.
Движењето инсистирало на мерки што се обиделе да ги воведат за да ги олесни тешкотиите, особено обидите да ги „контролира цените“ во рамките на своите можности „со оглед на тековната агресија“.
Хамас тврди дека комуницира со „сите компоненти“ на општеството во Газа, спомнувајќи други вооружени движења, „народни комитети и групи“ за „да ги реши проблемите предизвикани од окупацијата“.
Хуманитарните потреби се огромни на таа територија, која веќе беше под израелска блокада воведена во 2006 година пред војната, а е зафатена од сиромаштија и невработеност.
Помошта пристигнува, а поголемиот дел од населението е раселено во најјужниот дел, околу Рафа, во близина на затворената граница со Египет. Овој град пред војната имаше помалку од 300.000 жители, а сега е дом на повеќе од еден милион раселени лица, според проценките на ОН.
Во последните месеци, различни фигури на Хамас, како Калед Мехал, поранешниот шеф на политичкото биро на Хамас, оценија дека се неопходни „жртви“ за „ослободувањето“ на Палестинците.
Војната беше предизвикана од невиден напад на Хамас од Појасот Газа на 7 октомври против Израел, кој резултираше со смрт на најмалку 1.160 луѓе, главно цивили. Според Израел, биле киднапирани и околу 250 луѓе, а 130 од нив остануваат заложници во Газа, од кои 34 загинале.
Како одмазда, Израел вети дека ќе го уништи Хамас, кој го смета за терористичка организација, исто како и САД и Европската Унија, и започна офанзива во која загинаа најмалку 32.782 луѓе во Појасот Газа.
