Министерот за надворешни работи, Бујар Османи, го впери прстот во јавноста за да оправда зошто Македонија нема државен авион за евакуации. Тој кажа дека Владата ќе купела, ама се плашела што ќе каже јавноста. На ова реагираше пратеникот од ВМРО-ДПМНЕ, Драган Ковачки. Тој му порача дека никој не е против набавка на летало за потреби на државата, но проблем е што и постоечките не се одржуваат.
„Многу се загрижи Бујар Османи за тоа што мислела јавноста ако купеле авион за потреби на државата. Прво, никој не е против набавка на авион за потреби на државата, проблем е што и постоечките летала не се одржуваат и не летаат.
Г-не Османи Бујар: Јавноста смета дека работите против македонските национални интереси и распродавате се’ што не е Ваше, ама вие мака немате и сте запнале да го понижувате македонскиот народ. Јавноста смета дека пепел направивте со договорите за изградба и за надзор на коридорот 8 и 10д, па вие мака немате и крадете. Јавноста смета дека хирург треба да е во болница и да помага на граѓаните, ама Вам Ви е интересно да си играте со геополитички состојби и да глумите експерт. Јавноста смета дека треба да одговарате за мртвите во болницата во Тетово, за мртвите во автобусите на Беса и Дурмо, ама вас тоа не ве засега. Јавноста смета дека треба да ве снема од политичката сцена, ама Вам тоа не Ви е важно“, напиша Ковачки.
Изјавата на Османи е дадена за национална телевизија.
