„Ние комуницираме многу често меѓу себе и министерот Османи и министерот Маричиќ и јас и ако ја погледнете изјавата на министерот Османи, тогаш таа е многу јасна и не се разликува од неговите изјави во минатото, ниту пак се разликува од другите изјави“, истакна премиерот Димитар Ковачевски одговарајќи на новинарско прашање по посетата на ЈУДГ ОЦ „13 Ноември“.
„Прво, Бугарија имаше голем број на барања во текот на изминатиот период. Тие барања беа предмет на напорни и тешки преговори во кој што беше вклучено француското претседателство во текот на изминатата година. Во текот на тие преговори она што беше клучно за нас и што е отцртано во закалучоците на Собранието на РСМ е тоа кое што е дел од преговарачката рамка. Чист македонски јазик во преговарачката рамка, и во ЕУ, потпишување на договорот ФРОНТЕКС на чист македонски јазик, заедно со сите други јазици на ЕУ, на ист документ. И тоа гледате дека се случи, дел од вас беа на скринингот на почетокот на првата меѓувладина конференција, на сите преговарачки кабини стоеше македонски јазик. Европското законодавство се преведува на македонски јазик. Договорот со ФРОНТЕКС е потпишан на македонски јазик заедно со сите други јазици од ЕУ, одобрен од сите земји членки, вклучително и Бугарија и Грција, во тоа никој не веруваше во минатото дека може да се случи“, вели Ковачевски.
Тој додаде дека следна работа е што се бараше одржување на прва меѓувладина конференција за почеток на преговорите, и вие имате снимка во која што чешкиот МНР изјавува пред цела сала во Брисел, преговорите со Северна Македонија со ЕУ ги прогласувам за отпочнати“, нагласи Ковачевски.
Тоа можете да го пуштите на нашите граѓани уште еднаш да може да го видат, рече Премиерот.
„Тоа се обврски кои што ЕУ ги исполни. Она што останува да ние го направиме е нормално да го завршиме успешно скрининг процесот и да се изработат другите документи кои што се однесуваат на роадмапите за владеење на право, за демократија и за малцинските права, за сите малцински права, на сите заедници. Во однос на малцинските права сметам дека ние сме лидери во Европа, бидејќи ако постои држава во која малцинските права се заштитени и се унапредуваат и законски и институционално, за што основа е секако Охридскиот рамковен договор, сметам дека таква држава во светот не постои како нашата, во која што секој човек без разлика на неговата етничка припадност може да го планира својот личен и професионален живот во држава која што е еднаква за сите“, истакнува Ковачевски.
Ковачевски вели дека однесувањето на опозицијата и дава алиби на Бугарија.
„Од друга страна опозицијата сакајќи да го одолговлекува процесот, сакајќи повторно да ја внесе државата во изолација, може да и даде можност на Бугарија, да кажете, гледајте тие не сакаат да ги исполнат нашите обврски, а ЕУ ги исполнува своите обврски. Бидејќи ние имаме преговарачка рамка со ЕУ, немаме со Софија преговарачка рамка и скринингот се одвива во Брисел, не се одвива во некој други град. И затоа ако се придржуваме до преговарачката рамка тогаш и нема потреба да се размислува за било какви дополнителни барања од било кого, бидејќи сето она што е наведено е наведено во преговарачката рамка. Нормално дека ние имаме и билатерален договор со Бугарија исто како што имаме билатерален договор со Грција, кој што се одвива на билатерално ниво, кој што се наоѓа во општите одредби на документите со ЕУ, не во посебните бенч маркери и критериуми во кој што се оценува напредокот на државата, согласно копенхачките критериуми и тоа е нешто што е работа на МНР на историската комисија која што работи на паритетна основа и која што не може да донесе ниту една одлука доколку не се сложат сите историчари кои што се членови на Комисијата, а тоа значи сите претставници од нашата држава и сите претставници од соседната држава. Без консензус не може да биде донесено ниту едно решение. Она што до сега било донесено, тоа било донесено со консензус. И тоа што е донесено со консензус на паритетна основа и на реципрочна основа се имплементира во двете држави.
Точно ви објаснив на тоа што ви го кажав, затоа што ако ги погледнете ставовите на опозицијата, а можеби и не ви ги покажале, што ги лиферуваат по странски амбасади, тогаш ќе видите дека тие сакале нешто да додоговаат. Е кога ќе влезат во додоговарање тогаш ќе видите какви се барања можат да добијат од сите страни. Затоа ние имаме усвоена преговарачка рамка, одобрена од 27 земји членки на ЕУ, до која што сите земји на чело со претседателот на ЕС, Шарл Мишел, со претседателката на ЕК, Урсула фон дер Лајен, се придржуваат.“, потенцира Ковачевски.
Извор: https://civilmedia.mk/kovachevski-izjavata-na-osmani-za-baranata-na-bugarija-e-mnogu-jasna-i-ne-se-razlikuva-od-negovite-izjavi-vo-minatoto/
