Две компании на поранешниот американски претседател Доналд Трамп – „Trump Corporation“ и „Trump Payroll Corporation“, кои се дел од компанијата „Trump Organization“, се осудени пред судот на Менхетен во Њујорк за даночно затајување и фалсификување деловни документи.
Висината на казната ќе биде изречена кон средината на јануари, а таа би можела да достигне 1,61 милион долари. Самиот Трамп не беше обвинет за ништо, но неговиот долгогодишен финансиски директор во „Организацијата Трамп“, Ален Вајзелберг (75) се изјасни за виновен и сведочеше против компанијата со спогодба со обвинителството.
Трамп чист
Двете фирми беа прогласени за виновни по сите 17 точки од обвинението. Вајзелберг призна дека во претходните 15 години ги мамел даночните власти плаќајќи бонуси на себе и на другите директори во име на компанијата, плаќајќи им на вработените станови во компанијата, изнајмување автомобили, лични трошоци и трошоци за образование на децата. Фирмата тие трошоци ги чувала во книгите како расходи на фирмата и на нив не бил платен данок. Вкупната сума платена на овој начин не беше соопштена, но Вајзелберг призна дека за само една година, врз основа на разни обештетувања, тој лично требало да плати околу 200.000 долари данок, што не го направил.
Врз основа на тоа што се изјасни за виновен во договорот со обвинителството и сведочеше против компаниите на Трамп, Вајзелберг избегна 15-годишна затворска казна. Како дел од договорот, тој треба да биде осуден на само пет месеци затвор во јануари.
Се изјасни за виновен
Главниот финансиски директор на „Организацијата Трамп“, Ален Вајзелберг, ја призна вината и се соочува со пет месеци затвор.
Обвинителството, сепак, не успеа да докаже каква било вмешаност на Трамп во криминалната шема, иако тврдеше дека тој не само што знаел за тоа, туку и ја поддржувал за да ги задржи своите вработени среќни.
Сузан Нехелс од адвокатскиот тим на Трамп изјави дека на судењето не е докажана вмешаноста на Трамп во криминал и најави жалба на пресудата на компанијата.
Нарушена репутација
Од друга страна, главната обвинителка на Њујорк, Летиција Џејмс, рече дека пресудата против компаниите на Трамп докажува дека ниту поединци ниту компании нема да останат неказнети доколку го прекршат законот за да ги наполнат сопствените џебови.
