На 11 јануари 2019 година Собранието со 81 глас „за“ ги усвои уставните амандмани за преименување на Република Македонија со додавање на географската одредница „Северна“ наспроти јасно изразената волја на македонските граѓани искажана со масовниот бојкот на пропаднатиот референдум за името од 30 септември претходната година.
Потребното двотретинско мнозинство го обезбедија сите пратеници од владејачкото мнозинство предводено од СДСМ и ДУИ, но пресудија гласовите на осумтемина одметнати пратеници на опозицијата Елизабета Канческа-Милевска, Крсто Мукоски, Сашо Василевски, Љубен Арнаудов, Емилија Александрова, Нола Исмајлоска-Старова, Зекир Рамчиловиќ и Владанка Авировиќ.
На седницата не присуствуваа останатите пратеници на ВМРО-ДПМНЕ, кој ги исклучи од членство седумтемина што гласаа, прекршувајќи го партискиот став против промената на името на македонската држава.
„Изминатите 24 часа власта врши жесток притисок врз пратеници, нивни роднини и пријатели за да ги поддржат уставните измени. Имаме неформални сведоштва од луѓе, чиј идентитет од разбирливи причини нема да го откриеме, за јавувања од посредници, кои што се повикуваат на Зоран Заев. Во игра се пари, ветувања за ослободување од политички прогон, за возврат за поддршка на уставните измени за промена на уставното име. Македонија станува окупирана држава од луѓе коишто се на власт и на сила го менуваат името!”, реагираше ВМРО-ДПМНЕ.
„Република Македонија“ и официјално замина во историјата како име на државата на 12 февруари 2019 година.
ИЗВОР. https://www.expres.mk/petgodishnina-od-izglasuvanjeto-na-severna-nasproti-referendumot-za-imeto/?fbclid=IwAR23A6PhjZS4rYhwygndyotHXXzt-GTxR3EfOGywLZi0ON5Isgpp4_-Em5U