ПО ОДЛУКИТЕ НА АПЕЛАЦИЈА, ЗАЕВ ПРАШУВА Што е следно, Мијалков да стане директор на АНБ, а Груевски да се врати невин на бел коњ?

Експремиер Зоран Заев на својот Фејсбук профил реагира на одлуката на Апелацискиот суд да го врати на повторно судење предметот „Таргет-Тврдина“. Тој вели дека стотици илјади граѓани со години се бореле да ги урнат алчните арамии од режимот и успеале, а сега, некој се исмева со таа борба и се обидува да ја ништи освоената правда. Со двете поништени пресуди, директно се упатува на враќање, а со тоа и повторување на грозоморните дејствија на режимската врхушка и секако се мотивираат и други чинители да прават исти вакви громорозни дејствија со кои се газат масовно човекови права и сите вредности за кои се бореше целиот македонски народ пред само неколку години преку „Шарената револуција“. Што е следно, Мијалков да стане директор на АНБ, а Груевски да се врати невин на бел коњ? Па и утре да станеме членка на ЕУ тоа нема да го испере овој срам и блам. Ги повикувам сите надлежни од и околу правосудството, сите со грам одговорност за иднината на нашата земја и нашиот народ, да не дозволат да застарат делата на Мијалков и да направат сѐ виновниците да одговараат бидејќи за нивните злодела има докази чисти како ден – пишува Заев во објавата.