Швајцарската полиција приведе шест лица по насилен инцидент што се случил во вторник навечер во градот Винтертур. Меѓу приведените се и двајца малолетници од Северна Македонија, на возраст од 15 и 17 години.
Настанот бил пријавен нешто пред 21:00 часот во населбата Винтертур–Сенхоф, откако било јавено дека на улица лежи лице со повреди на главата. Кога пристигнале полициските патроли, затекнале повеќе лица вмешани во физичка пресметка.
Од расправија до тепачка
Според првичните информации од истрагата, конфликтот почнал како вербална расправија, но брзо ескалирал во тепачка, при што бил употребен и бибер-спреј.
Повредени лица
Во инцидентот биле повредени три лица – државјани на Сирија (на возраст од 48, 18 и 17 години). Тие се здобиле со полесни повреди и со Итна помош биле пренесени во болница.
Повреден бил и 15-годишниот тинејџер од Северна Македонија, кој според полицијата сам се јавил на лекар за дополнителни прегледи.
Кои се приведени?
Полицијата привела и испрашала вкупно 6 учесници:
-
трите повредени лица од Сирија
-
двајца малолетници од Северна Македонија (15 и 17)
-
еден 16-годишен државјанин на Швајцарија
Сите инволвирани ќе бидат процесуирани според швајцарските закони, а постапката ќе ја води Обвинителството за малолетници или надлежното јавно обвинителство – зависно од возраста на осомничените.
