Со притисоци и мобинг врз вработени директори на болници и клиники сакаат да ги одвратат вработените утре да излезат на протест, обвинуваат од независниот синдикат на здравствени работници. Тврдат дека покрај електронските картички им вовеле и запишување во тетратка кој кога доаѓа на работа за да ги следеле членовите на Синдикатот. Велат дека бараат само подобри услови и повисоки плати за 30 проценти.
– Ако велат наредната година ќе има 30 проценти зголемување, ако има пари за буџетот за 2024, зошто тоа не го направија сега, вели Лазар Костовски, координатор во независниот синдикат на здравствени работници.
Од Независниот синдикат на здравствени работници велат дека членството им расте и многу членови од другите здравствени синдикати поминале кај нив. Од Синдикатот на Клинички, пак, ни потврдија дека овој период нема ниту еден испис на нивни член.
– Многу здравствени работници си одат од државата поради ниските плати и немањето на доволно кадар во здравствените установи и тоа е една од причините за лошата слика на здравството, вели Гоце Делчев, главен координатор на независните синдикати во КСОМ
Доколку не бидат повикани од здравствените власти на разговори и преговори за исполнување на нивните барања, од Независниот синдикат на здравствени работници најавија и протестен марш.
Денеска протести за време на паузата беа најавени и на вработени во Заводот за физикална медицина и рехабилитација, но тие не се одржаа.
