Лет во Кина бил одложен на повеќе од четири часа откако патник фрлил парички во моторот на авионот. Летот на Чајна Соутерн Ерлајнс требал да полета од Санја за Пекинг околу 10:00 часот, но полетал дури четири часа подоцна.
На видеото споделено од бројни државни медиуми, стјуардесата го прашува патникот колку монети фрлил во моторот, на што мажот одговара – меѓу три и пет. Полицијата подоцна го изнела патникот од авионот и го вратила на аеродромот. Авиокомпанијата соопшти дека монетите биле пронајдени при безбедносните проверки.
„Персоналот за одржување на авионот изврши сеопфатна безбедносна проверка и утврди дека нема безбедносни проблеми пред полетувањето“, соопшти службата за клиенти на авиокомпанијата, како што јави Си-Ен-Ен.
Чајна Соутерн Ерлајнс издаде предупредување за „нецивилизирано однесување“ во средата, велејќи дека фрлањето парички во моторот на авионот претставува закана за безбедноста. Во Кина во изминатите неколку години имаше неколку вакви инциденти, а патниците фрлаа парички кон авионот верувајќи дека тоа „носи среќа“.
