Шеикот од Саудиска Арабија ќе го забави сообраќајот во Скопје. Поради неговата посета од денеска до сабота ќе има посебен сообраќаен режим- улици ќе бидат затворени, автомобили пренасочувани. Но поради негова безбедност, од полицијата не соопштуваат кои делови од градот ќе бидат затворени.
Со посебниот режим кој ќе го спроведе Единицата за безбедност на патниот сообраќај ќе бидат опфатени сообраќајниците на поширокото централно подрачје на град Скопје. Од тие причини, МВР апелира до сите граѓани учесници во сообраќајот да се почитуваат наредбите кои ќе ги даваат униформираните полициски службеници. – стои во соопштението на МВР.
Шеикот Абдулах Бин Мухамед, е вечен претседател на Собранието на Саудиска Арабија. Со негови 76 години, го предводи Парламентот уште од 2009 година.
Шеикот утре е предвидено да се сретне со претседателот Пендаровски и со неговиот колега Талат Џафери. Ќе ја посети и Мустафа пашината џамија на скопско Кале каде ќе се сретне со претставници на Исламската верска заедница, но не и со поглаварот кој е моментално во Саудиска Арабија.
