ЈАР го тужи Израел за геноцид пред Меѓународниот суд на правдата
Јужноафриканската Република побара од Меѓународниот суд на правдата (МСП) итно да прогласи дека Израел ги прекршил своите обврски од Конвенцијата за геноцид во војната против Хамас во Газа.
Тужбата е последниот потег на Јужна Африка, која е многу критична за војната на Израел во Газа. Минатиот месец, пратениците на ЈАР гласаа за затворање на израелската амбасада во Преторија и за суспендирање на сите дипломатски односи додека не се договори прекин на огнот во израелската војна против исламистичката група Хамас во Газа.
Во соопштението на Одделот за меѓународни односи и соработка на Јужна Африка (ДИРКО) се вели дека жалбата против Израел е поднесена денеска. „Почнувајќи од 7 октомври 2023 година, Израел не спречи геноцид и не гони директно и јавно поттикнување на геноцид“, соопшти DIRCO.
Во соопштението за печатот се наведува дека JAР побарала од МСП да објави „на итна основа дека Израел ги прекршува своите обврски од Конвенцијата за геноцид“. Од Меѓународниот суд на правдата се бара и привремено да побара од Израел да ги прекине своите воени операции во Газа. Јужна Африка може да ја покрене оваа постапка врз основа на Конвенцијата за геноцид бидејќи и Израел и Јужна Африка се потписници на таа конвенција.
Со децении, JAР ја поддржува палестинската борба за државност на териториите окупирани од Израел, изедначувајќи ја позицијата на Палестинците со позицијата на црното мнозинство во Јужна Африка за време на репресивниот период на апартхејдот, споредба што Израел жестоко ја негира.
Израел го отфрли поднесувањето на случајот за геноцид од Јужна Африка пред Меѓународниот суд на правдата како бесмислена клевета без правна основа и рече дека го почитува меѓународното право во војната против Хамас во Газа.
„Јужноафриканската Република соработува со терористичка група која повикува на уништување на Израел. Населението во Газа не е непријател на Израел, а Израел се обидува да не им наштети на цивилите“, се вели во соопштението.
