LAJMI I FUNDIT – VIDEO/ TËRMET I FORTË GODET KRYEQYTETIN, TRE TË VDEKUR: “NDËRTESAT LËKUNDESHIN SI PEMË”
Një tërmet i fuqishëm me magnitudë 5.7 goditi Bangladeshin mëngjesin e së premtes, duke shkaktuar të paktën tre viktima dhe disa të plagosur, ndërsa paniku përfshiu kryeqytetin Dakë.
Sipas autoriteteve dhe raportimeve të Reuters, një godinë gjashtëkatëshe u shemb gjatë lëkundjeve, duke u marrë jetën tre personave. Disa ndërtesa të tjera u dëmtuan rëndë në zonat më të populluara të kryeqytetit.
Tërmeti është ndier edhe në disa pjesë të Indisë.
Banorët të tmerruar u hodhën jashtë shtëpive
“Ndjemë një tërmet shumë të fortë, ndërtesat lëkundeshin si pemë. Shkallët u mbushën me njerëz që vraponin, të gjithë ishin të frikësuar, fëmijët qanin”, rrëfeu Suman Rahman nga Daka.
Edhe punonjësi i një kompanie private, Sadman Sakib, përshkroi momentet e panikut:
“Gjatë punës filloi të dridhej mobilja. Vrapuam menjëherë drejt shkallëve dhe në rrugë pamë dhjetëra njerëz të tjerë të tmerruar.”
📹 Pamjet e tërmetit po qarkullojnë në rrjetet sociale, ku shihen ndërtesa që lëkunden dhe njerëz që largohen me nxitim nga banesat.
Autoritetet paralajmërojnë se bilanci mund të rritet, ndërsa ekipet e shpëtimit po vazhdojnë kërkimet në ndërtesat e dëmtuara.
