Крајот на третата сезона на „And Just Like That“ остави можност за продолжение, што нема да се случи. 26 години по првата епизода, целата приказна – барем засега – добива крај.
По три сезони, серијата на HBO „And Just Like That“, продолжението на култниот „Сексот и градот“, официјално е откажана. Веста ја потврди главната актерка и продуцентка Сара Џесика Паркер, која се збогува со ликот што ја одбележа нејзината кариера – Кери Бредшо – со трогателна порака.
„Кери е моето професионално срцебиење 27 години“
Паркер објави емотивно писмо на Инстаграм во кое им се заблагодари на сите што ја создадоа серијата со неа, но и на гледачите кои ја сакаа и ја поддржуваа Кери низ децениите, иако понекогаш ја осудуваа.
„Кери Бредшо доминираше во мојот професионален живот 27 години. Мислам дека ја сакав најмногу. Знам дека и другите ја сакаа. Фрустрирани од неа, навивајќи за неа. Таа симфонија од емоции беше најважниот придружник. Засекогаш ќе бидам благодарна“, напиша Паркер, потврдувајќи дека „ова поглавје е завршено“.
Таа додаде дека таа и креаторот на серијата Мајкл Патрик Кинг заеднички одлучиле дека „And Just Like That “ нема да има нова сезона. Серијата, истакна таа, беше „радост, авантура и најубав вид на напорна работа“ во соработка со неверојатна екипа и повеќе од 380 членови на продукцијата.
„Таа се предаде на капи, книги, чевли, пријатели и ветување за нов ден во нејзиниот сакан град и луѓето што ги ценеше најмногу. Носеше срам, гордост, чест, оптимизам и буквално безброј фустани и здолништа. Се држеше за раце, надежи и најдобри луѓе“, додаде актерката за својот лик.
Што се случи потоа?
„And Just Like That “ ги обедини Кери, Миранда и Шарлот во современ Њујорк, но без Саманта (Ким Катрал), која се појави само во кратка сцена на крајот од втората сезона. Серијата се обиде да ја балансира носталгијата и современите социјални теми, но реакциите на публиката и критиката беа мешани. Некои го пофалија освежениот пристап и новите ликови, додека други го критикуваа дијалогот, наметнатиот тон и наративната дезориентација.
Сепак, рејтинзите беа солидни, а крајот на третата сезона остави можност за продолжение, што нема да се случи.
Серија што ги обликуваше генерациите
Оригиналната серија „Сексот и градот“ се емитуваше на HBO од 1998 до 2004 година, низ 6 сезони и 94 епизоди. Таа освои 7 Еми награди, 8 Златни глобуси и милиони обожаватели низ целиот свет. Следеа два филма (2008 и 2010 година), а потоа и продолжение во форма на „And Just Like That “, кое започна во 2021 година.
Серијата беше револуционерна за своето време – отворено зборуваше за женската сексуалност, пријателството, модата и модерните предизвици на животот во голем град. Кери, Миранда, Шарлот и Саманта станаа икони на поп-културата, а Њујорк стана петтиот главен лик.
26 години по првата епизода, целата приказна – барем засега – добива крај.
Фото: EPA Image
Извор: Kurir.rs
