ДЕТАЛИ ОД СТРАВИЧНАТА ТРАГЕДИЈА НА АВТОПАТОТ БЕЛГРАД–НИШ ВО КОЈА ЗАГИНАА ДВЕ ЛИЦА ОД МАКЕДОНИЈА
Автомобил излетал од патот – две лица загинаа, трето хоспитализирано
Во тешка сообраќајна несреќа што се случи рано утрово на автопатот Белград–Ниш, животот го загубија две лица, додека трето е повредено и пренесено во болница.
Според првичните информации, несреќата се случила во близина на патарината Умчари, кога патничко возило марка „сеат“, со германски регистарски таблички, излетало од коловозот. Возилото најпрвин удрило во заштитната ограда, а потоа и во сообраќаен знак.
Од возилото биле извлечени маж и жена, кои, за жал, починале на самото место. Трето лице се здобило со повреди и итно било пренесено во здравствена установа.
Неофицијално, се наведува дека возачот изгубил контрола врз возилото, а како можни причини се споменуваат замор и заспивање зад воланот. Загинатите, според првичните информации, биле државјани на Северна Македонија со албанско потекло.
Увидот на местото на несреќата е во тек, а надлежните органи спроведуваат истрага за целосно расветлување на околностите што довеле до оваа трагедија.
