Со 81 глас „за“ во Собранието беа усвоени измените на Законот за прекршоци со кои официјално стартува проектот „Safe City“. За законот гласаа пратениците од ВМРО-ВЛЕН-ЗНАМ, Левица и независниот пратеник Илир Демири, со што од 1 февруари во сила ќе стапат камерите поставени во Скопје, Куманово и Тетово.
Претходно, координаторот на пратеничката група на Левица, Борис Кермов, изјави дека партијата ќе го поддржи законот, нагласувајќи дека тоа се прави во интерес на безбедноста на граѓаните.
„Шесте пратеници на Левица ќе гласаат за измените на Законот за прекршоци, конкретно за ‘Safe City’ во Скопје, Куманово и Тетово“, изјави Кермов.
Пратеничката од ДУИ, Рина Ајдари, се изјасни против „Safe City“, како и Ријад Шаќири и Илуре Даути. По изгласувањето со 81 глас „за“, Ајдари побара поединечно и јавно гласање, но и тогаш повторно беа регистрирани 81 глас „за“.
Со ова, системот „Safe City“ официјално ќе почне да изрекува казни од 1 февруари, а во првата фаза ќе се применува само во трите наведени градови.
