Kërkesa për ulëse në avionët privatë në Rusi është rritur, pasi Vladimir Putin njoftoi një mobilizim të pjesshëm, raporton The Guardian, përcjell Gazeta Online Reporteri.net.
Rusët e pasur po kërkojnë një mënyrë për të lënë vendin, ndërsa shqetësime janë ngritur edhe nga raportet se autoritetet po përgatiten të mbyllin kufijtë për burrat në moshë luftarake.
Pasagjerët e këtij lloji shkojnë kryesisht në Armeni, Turqi dhe Azerbajxhan, të cilat lejojnë rusët të hyjnë pa vizë.
Ata do të paguajnë nga 22,000 deri në 28,000 euro për një vend në një avion privat.
Çmimi për marrjen me qira të një makinerie me tetë ulëse varion nga afërsisht 90.000 deri në 150.000 paund, që është disa herë më shumë se zakonisht, thekson The Guardian.
“Situata është absolutisht e çmendur për momentin,” tha Yevgeny Bikov, drejtor i kompanisë “Your Charter”.
“Zakonisht kemi 50 kërkesa (për fluturime me avionë privatë) në ditë; sot është afërsisht 5000,” shtoi ai.
Shumica e biletave me një drejtim për fluturimet tregtare nga Rusia janë shitur disa ditë përpara. Radhë të gjata makinash në pritje po krijohen gjithashtu në pikat kufitare tokësore nga Rusia në vendet fqinje.
