Комисијата за хартии од вредност даде одобрение МЖ-Транспорт да ја издаде 4-тата емисија на акции по пат на приватна понуда. Со четвртата емисија, Друштвото ќе издаде 962.913 обични акции при што продажната цена по акција е еднаква со номиналната и изнесува 1.000 денари по акција.
– Вкупната продажна вредност на емисијата е 962.913.000 денари (15,7 милиони евра). Друштвото издава хартии од вредност заради зголемување на основната главнина, односно заради создавање услови за непречено функционирање. Приватната понуда е наменета за познат купувач, постојниот единствен акционер – Владата на Република Македонија, како институционален инвеститор – се наведува воп соопштението од КХВ.
Ова државно претпријатие е редовен загубар и должник. Само во првата половина од годинава загубите достигнаа 65 милиони евра.
Владата подолг период планира да го реши проблемот со либерализација на железничкиот транспорт за што подготви измени и на законот според кој се предвидува – превозот на патници и стока да се врши од приватно домашно или странско правно лице, т.е. да го отвора пазарот за други железнички превозници.
