Покрај загадениот воздух чиј причинител е палењето на дивите депонии во Општина Ѓорче Петров, жителите на оваа скопска општина се жртви и на токсичниот воздух од соседните општини, велат од политичката партија Левица.
„Во повеќе наврати алармиравме за често неподносливиот воздух од Општина Сарај, а на кои се принудени жителите на Ѓорче Петров во урбаниот дел на Општината.
Овој пат, до нас стаса информација, слики и сведоштва од жители од други делови на Општината (непосредно до село Орман).
Имено, станува збор за компанија која покрај тоа што врши откуп на акумулатори и рафинира олово, граѓани сведочат и за постојано пристигање на шлепери со српски регистарски таблички, како и за неподнослив мирис особено во доцните часови. Едноставно никој не знае што точно се гори овдека, а ниту пак некој се осудил да изврши контрола.
Иако прилично далеку од очите на граѓаните, сепак ваквиот токсичен воздух ‘патувајќи’ долж реката Лепенец е присутен и интензивен за жителите во Општина Ѓорче Петров.
Законодавецот пропишал минимум услови и технички решенија, кои треба да ги почитуваат фирмите за рециклажа на вака опасни тешки метали, меѓутоа, како и сѐ во нашата држава, често пати, се заобиколуваат прописите и законите кои ја регулираат оваа проблематика.
Друг проблем се нередовните инспекциски контроли, кои ако ги има се извршуваат формално (практично, колку да се собере рекет), а најчесто и се прескокнуваат.
Дополнително, несоодветната селекција на инспекциските служби, прави овој проблем да достигне алармантни состојби со труење на луѓе, пропратено со енормно зголемување на карциноми и други тешки заболувања кај населението, особено кај децата.
Македонија чекор по чекор станува депонија на регионот со увезување на секаков отпад.
За ваквото труење сe виновници како органите од централнaта, така и локалната власт.
Општина Ѓорче Петров и градоначалникот Стојковски е редно време да се заангажира на ова поле. За почеток: конструирање на конечно конструктивна и реално потребна меѓуопштинска соработка; итно расчистување на дивите депонии во Општината; активност и достапност на комуналните редари и инспекторите за животна средина“, се вели во соопштението на Левица.
Извор:
