Адвокатот на таткото на убиената Вања Ѓорчевска утре до Апелацииониот суд во Скопје ќе поднесе жалба за притворот на Александар Ѓорчевски бидејќи тој се уште не е повикан на распит.
Освен жалба за притворот, бранителот ќе бара и инфорамции како снимките, на кои се слуша гласот на Александар Ѓорчевски, стигнале во рацете на контроверзниот српски политичар Срѓан Ного.
– Како бранител, до овој момент бев доволно трпелив и имав разбирање. Неколку пати го контактирав Јавниот обвинител, меѓутоа до овој момент не добив одговор, ниту покана мојот клиент да даде исказ и да бидеме повикани во просториите на ОЈО да се запознаеме со доказите поради кои има основано сомнение за негова инволвираност. Јас сум лично изненаден од објавувањето на тие материјали. Истражните органи ќе треба да дадат одговор како и на кој начин се креирани материјалите и како дошле до лицето кое ги објавува. Во оваа прилика, јас можам да ја потврдам автентичноста на оној аудио запис каде што се слуша гласот на таткото, а надлежните истражни органи ќе треба да дадат одговор кој го креирал овој аудио материјал и како овој материјал е дојден до лицето кое ги објавува – вели Владимир Туфегџиќ за Телевизија 24.
Од Обвинителството пак велат дека Ѓорчевски веќе дал исказ.
– Истражната постапка е во тек. Јавниот обвинител ги спроведува истражните дејствија онака како што налагаат доказите и потребите на постапката. Лицето за кое покажувате интерес даде свој исказ уште на почетокот на постапката. За разлика од останатите осомничени, тој ја негираше неговата инволвираност и какви било сознанија за настанот. Што се однесува до објавените снимки, јавното обвинителство веќе апелираше лицата кои објавуваат вакви снимки да размислат за етичноста на објавите и за вознемирувањето што го предизвикуваат кај семејствата на жртвите. – велат од Основното јавно обвинителство Скопје.
Срѓан Ного објавува фотографии и аудио и видео записи на неговите социјални мрежи за овој случај.
ИЗВОР. https://www.expres.mk/odbranata-na-tatkoto-na-vanja-kje-podnese-zhalba-za-pritvorot/?fbclid=IwAR1PemIcELY9mU9JjjEt3Yrqvk8dRyJp-UOSalcmVTKyg8o22R2geC0p0-U
