Засега терапија ќе добијат само осум пациенти со цистична фиброза кои се во потешка здравствена состојба. Останатите пациенти не знаат кога ќе ги добијат лековите кои им се нужно потребни. Поради тоа, лицата со оваа ретка болест излегоа на протест пред Влада.
Министерот за здравство, Беким Сали рече дека скапиот лек „Трикафта“ најпрвин ќе се набави за осум пациенти со потешка форма на болеста. Како што вели, прават обиди до крајот на годината лекот да го добијат уште 30 пациенти. Набавката ќе почне откако ќе се изменат потребните закони, со цел да може лекот да се купи директно од производителот. Сали вели дека не може да каже кога точно лекот ќе пристигне во Македонија.
„Во моментов поради итноста на ситуацијата, 8 пациенти се во потешка состојба, а околу 22 се во средно-тешка здравствена состојба. Поради тоа што почнуваме со третман со оваа терапија, фокусирани сме на пациентите со потешка форма на болеста“, вели Беким Сали.
Во однос на барањето на Асоцијацијата за цистична фиброза за потпишување писмена гаранција дека терапијата ќе биде обезбедена за сите пациенти, министерот за финансии, рече дека гаранција е нивното излегување пред медиумите.
Во Македонија има околу 130 лица со цистична фиброза, но не се сите потенцијални пациенти кои имаат потреба од лекот „Трикафта“, рече ресорниот министер, Сали. Пациентите со оваа ретка болест утре напладне ќе протестираат пред Владата, бидејќи како што велат, не веруваат во она што го велат надлежните.
