Притвор за мажот кој во битолско казионо запали шест апарати за игри на среќа

Основното јавно обвинителство Битола поведе постапка против 35-годишен жител на селото Долно Оризари, кој е осомничен за кривично дело предизвикување општа опасност од член 288 став 1 од Кривичниот законик.
На 2 март, во вечерните часови, осомничениот влегол во казино на улицата Лазо Трповски во Битола, се качил на катот од објектот, каде што имало и други лица, па истурил бензин врз шест слот-машини и ги запалил. Со тоа предизвикал пожар, кој зафатил дел од инвентарот и предизвикал значителна опасност за животот и телото на луѓето и за имотот од големи размери.
По предлог од надлежниот јавен обвинител, судијата на претходна постапка од Основниот суд во Битола определи мерка притвор во траење од осум дена за осомниченото лице.