Кремљ потврди дека постигнал договор со Пригожин за ставање крај на бунтот. Пригожин ќе се пресели во Белорусија, а кривичното дело против него ќе биде отфрлено. Борците кои му се придружија нема да бидат кривично гонети, а тие кои не учествуваа на маршот ќе бидат под контрола на руската војска.
Рускиот претседател Владимир Путин се согласи да дозволи моќниот шеф на платениците на групата Вагнер, Евгениј Пригожин да се ослободи и да замине за Белорусија. Одлуката дојде по напнатите 24 часа, кои за лидерот на Кремљ преставуваа најголемата закана во неговото повеќе од дведецениско владеење и предизвика страв од можна крвава граѓанска војна.
Пригожин, чии војници беа најефикасни борци меѓу силите на Путин од инвазијата на Украина во февруари 2022 година, се сврте кон руската војска и го предводеше она што беше наречено вооружено бунт, наредувајќи им на своите сили, за кои тврдеше дека се 25 илјади, да напредуваат кон Москва пред да го запре својот таканаречен „марш за правда“ на 24 јуни.
Кремљ подоцна потврди дека постигнал договор со Пригожин за ставање крај на бунтот, велејќи дека водачот на платениците ќе се пресели во Белорусија и дека кривичното дело против него ќе биде отфрлено. Рано на 25 јуни не се знае каде е Пригожин или дали заминал за Белорусија.
За возврат, борците на Вагнер кои му се придружија на Пригожин на неговиот марш нема да бидат кривично гонети, соопшти Кремљ. Како дел од договорот, борците на Вагнер кои не учествуваа на маршот сега ќе бидат под директна контрола на руската војска, потег на кој Пригожин жестоко се спротивстави додека ги водеше своите трупи во војната на Кремљ против Украина. Белорускиот моќник Александер Лукашенко помогна да се посредува во договорот, соопшти Кремљ. Портпаролот на Кремљ, Дмитриј Песков, рече дека Путин и Лукашенко ја гарантирале безбедноста на Пригожин.
Неколку часа подоцна, гувернерот на Ростовската област Василиј Голубев на Телеграм изјави дека силите на Вагнер се повлекуваат од јужниот град Ростов на Дон во конвои, придружувани од тенкови и други возила и се упатиле кон нивните теренски кампови. Платеничките борци претходно ја презедоа контролата врз воената база во градот со 1,2 милиони жители во близина на границата со Украина.
Засега не е јасно каде ќе бидат сместени или колкумина учествуваа во маршот кон Москва. Тие претходно се бореле во Украина, но Пригожин најавил дека ги предаваат своите позиции на руската војска.
Путин вети дека ќе ги казни оние што стојат зад вооружениот бунт предводен од неговиот некогашен штитеник. Во телевизискиот говор до нацијата, Путин го нарече бунтот „предавство“.
