Обвиненијата за двајцa генерални секретари на Влада, станицата за технички прглед каде поминал автобусот на Беса транс, неправилната денационализација на фабриката Треска, земјиште на Пуцко Петров во Карпош се само дел од предмети кои ѝ пресудија на јавната обвинителка Вилма Русковска. Таа ова вечерва го изјави во интервју за 360 степени, додавајќи дека за Драги Рашковски имала политички притисоци, да не се покрене обвинение.
На новинарска констатација дека „ако човек биде саркастичен, ќе рече – за многу малку работи СДСМ, ДУИ и ВМРО-ДПМНЕ имаат исти ставови или постигнуваат консензус, а нејзиното разрешување од функцијата јавен обвинител личи на една таква работа“, Русковски коментираше дека политиката никогаш немала влијание врз нејзината работа.
А за ова што велите дека моето разрешување е една од ретките работи за кои партиите постигнале консензус, тоа е веројатно затоа што без разлика кој и на која политичка партија припаѓа, кога имало доволно докази, се процесуирале обвиненија“, рече таа.
За реакцијата на опозициската ВМРО- ДПМНЕ во која се вели дека „сосема е можно ова (разрешувањето, н.з.) да е резултат на ‘мафијашка пресметка’ во правосудството, но како факт останува дека Русковска доби заслужена максимална деградација од Советот на јавни обвинители“ и дека како обвинител за кој реагирале дека е „инструмент на власта во прогонот кон неистомислениците и патриотите, Вилма Русковска допрва ќе има прилики да зборува и да ги признае сите злодела кои ги извршила како и тоа по чија наредба“, таа вели дека никогаш не била инструмент на која било партија.
„Со самото тоа што беа обвинети двајца генерални секретари на актуелнава власт мислам дека тоа доволно зборува. А што се однесува до членови или приврзаници на ВМРО-ДПМНЕ, веројатно мислат на предметот за 27 април за кој треба да се знае дека беше рефериран пред сите заменик-обвинители во Јавното обвинителство на Република Македонија, беа присутни колеги од Вишото обвинителство и одлуката беше едногласна – предметот да се процесуира со таа правна квалификација за ‘терористичко загрозување на уставниот поредок и безбедност’“, вели Русковска.
Формално, дисциплинската постапка за Русковска беше отворена по случајот со претресот во Управата за финансиска полиција. Но, прашана што реално и пресуди, таа наведе неколку постапки.
„Се отворија повеќе постапки. Како што кажав, двајца генерални секретари на Владата, потоа за станицата за технички преглед ‘Виа комерц’, се отворија и постапки по пријава на државното правобранителство во педистрага и за неправилната денационализација на фабриката ‘Треска’. Се отвори предистрага и за земјиштето во Општина Карпош на ‘Пуцко Петрол’, исто по пријава на државното правобранителство“, одговори таа.
Инаку, членовите на Советот на јавни обвинители во четвртокот едногласно ја разрешија поранешната шефица на Јавното обвинителство за гонење на организиран криминал и корупција, Вилма Русковска, од функцијата јавен обвинител.
