Основното јавно обвинителство Гостивар донесе наредба за спроведување истражна постапка против 30-годишен гостиварец затоа што постои основано сомнение дека сторил кривично дело производство и дистрибуција на детска порнографија од член 193-а став 1 од Кривичниот законик.
Во периодот од 2022 година до 26.6.2023 година во Гостивар осомничениот произведувал детска порнографија снимајќи во повеќе наврати сексуален однос со 15-годишно дете жртва. Снимениот видеоматеријал и фотографиите тој ги зачувал во меморијата на мобилниот телефон со цел да ги дистрибуира, пренесува и нуди на друг начин.
Бидејќи постојат околности што укажуваат на опасност од бегство, можност осомничениот да ја попречува кривичната постапка со влијание врз сведоците, како и особени околности што го оправдуваат стравот дека ќе го повтори кривичното дело, надлежниот јавен обвинител до судијата на претходна постапка од Основниот суд во Гостивар достави предлог за определување мерка притвор.
