Повеќе од 1.300 демонстранти во десетици градови во Русија досега се уапсени на протестите против делумната воена мобилизација на руските државјани која ја нареди претседателот Владимир Путин, наведува организацијата „ОВД-Инфо“.
Стотици луѓе се уапсени во Санкт Петербург и Москва, а Радио Слободна Европа јавува дека московското обвинителство им се заканило на учесниците на протестите со казна затвор и до 15 години.
Би-Би-Си наведува дека тие би можеле да бидат кривично гонети според законите против дискредитација на вооружените сили, ширење „лажни вести“ за руската воена операција во Украина или охрабрување малолетници да протестираат.
Острите казни во Русија за ширење „дезинформации“ за војната во Украина и малтретирањето на активисти против Путин од страна на полицијата ги направи ретки јавните антивоени протести.