Алијанса за Албанците ќе ја поддржи промената на Уставот, но само доколку се прифати нејзиниот пакет од пет барања. Ова денеска го посочи Арбен Таравари, кој на прес-конференција што се одржа во Тетово посочи дека тие нивни барања биле едноставни и Владата би требало без проблеми да ги прифати. Кои се барањата е сѐ уште енигма. Вели дека тие наскоро јавно ќе бидат објавени. Едно од тие барања е во Уставот да се избрише клаузулата 20% од населението кое зборува јазик различен од официјалниот јазик и наместо тоа да се стави албанскиот јазик.
„Нашите услови за уставните промени ќе бидат пакет мерки кои ќе ги побараме од Владата и нив ќе ги презентираме кон крајот на идната недела. Претходно, овој пакет мерки ќе го презентираме и пред амбасадорите од најзначајните земји. Нашиот предлог ќе биде нешто што не може да се одбие. Едно од нашите барања ќе биде еднаш за секогаш да го тргнеме тоа 20отсто и да биде барем како што беше во Југославија, кога македонскиот и албанскиот јазик беа јазици кои официјално се користеа. А за тоа дали ќе бидеме и дел од мнозинството, тоа сметам дека повеќе е спин од ДУИ кои таму се поделени во 3-4 фракции и не може да се поврзе кој со кого е. Иако ова е шпекулација, но ако има таков предлог тој треба сериозно да се разгледа во партиските тела и таму да се донесе одлука без разлика каква ќе биде таа“, изјави Таравари.
