Хрватската полиција утринава по налог на Канцеларијата на европскиот јавен обвинител (ЕППО) упаднала во министерството за култура и медиуми во врска со истрага за случај на незаконско трошење пари од фондовите на Европската Унија на Геодетскиот факултет во Загреб.
Како што неофицијално дознава Јутарњи лист, истражителите, со соодветни налози, влегле во соодветното министерство за да извршат претреси на канцелариите на службеници на министерството за кои постои сомнеж дека учествувале во незаконски дејства. Официјални информации за претресите нема и не е објавено кои се потенцијалните осомничени. Но, наводно, под лупата на истражителите се високорангирани луѓе од министерството за култура на Хрватска.
Според засега достапните информации, никој не е уапсен, туку истражителите собираат податоци, пред сè за електронската кореспонденција од компјутерите и мобилните уреди на одредени лица.
Хрватската полиција по налог на Европското обвинителство во јануари повеќе пати влегуваше во министерството за култура, од кое собрале документација врзана за проекти н а Геодетскиот факултет, чии поранешни први луѓе Алмин Џапо и Бошко Прибичевиќ на почетокот на ноември беа осомничени за извлекување на милиони евра од ЕУ фондовите.
Според медиумите, актуелната министерка за култура Нина Обуљен Коржинек „со лична одлука и без тендер исплатила 19,1 милион куни со ДДВ на Геодетскиот факултет за длабинско снимање на згради по големите земјотреси кои во 2020 година ја погодија Хрватска“.
