По подолга пауза, главниот град повторно ќе пулсира со голема новогодишна прослава на плоштадот „Македонија“. Градоначалникот Орце Ѓорѓиевски најави дека програмата ќе биде целосно посветена на домашни музички ѕвезди, со настапи на Каролина, Тамара, Куку Леле и 2Бона.
Забавата започнува во 19:45 часот и е креирана така што ќе ги задоволи сите вкусови и генерации – од љубителите на боемска музика, преку поп-рок фановите, до најмладата публика која ги следи трендовите.
Ѓорѓиевски потенцира дека целта на дочекот е да се врати празничната магија и заедништвото меѓу скопјани. Градот ги поканува сите граѓани и гости да учествуваат во оваа „новогодишна приказна“ и заеднички да ја пречекаат 2026 година.
