Rritje e shkurorëzimeve në Kosovë: Mbi 1.300 raste të regjistruara në dhjetë muaj
Numri i shkurorëzimeve në Kosovë ka shënuar rritje gjatë vitit 2025. Sipas të dhënave të publikuara nga Agjencia e Statistikave të Kosovës (ASK), në periudhën janar–tetor 2025 janë regjistruar gjithsej 1.341 shkurorëzime, duke reflektuar një nivel të konsiderueshëm të çifteve që i kanë dhënë fund martesës së tyre.
Vetëm gjatë muajit tetor janë regjistruar 158 raste të shkurorëzimeve në vend. Krahasuar me muajin shtator, ky numër paraqet një rritje prej 18.8 për qind.
“Sipas të dhënave për muajin tetor, janë evidentuar 158 raste të shkurorëzimeve. Krahasuar me muajin shtator, vërehet rritje e numrit të çifteve të shkurorëzuara për 18.8%”, thuhet në raportin e ASK-së.
Këto të dhëna tregojnë një trend në rritje të shkurorëzimeve gjatë vitit, duke ngritur diskutime mbi faktorët socialë dhe ekonomikë që ndikojnë në stabilitetin familjar në Kosovë.
