Heroi nga Dobanovci, Vidoje Nenadiq (70), i cili shpëtoi një djalë trevjeçar nga një gropë septike dhe më pas i dha ndihmën e parë për t’i nxjerrë ujin nga mushkëritë dhe për ta rikthyer në frymëmarrje, thotë se para aktit të tij të guximshëm kishte parë një ëndërr të pazakontë. Ai kishte ëndërruar Shën Petkën, mbrojtësen e grave, të sëmurëve dhe të varfërve.
“E pashë në ëndërr Shën Petkën, mbrojtësen time gjatë gjithë jetës. Shikoj shumë ëndrra dhe jam i shqetësuar në gjumë. Ajo më buzëqeshi dhe të nesërmen pata fat – më shikoi e bekuara Parashqevi dhe unë shpëtova djalin nga një vdekje e sigurt”, rrëfeu Vidoje.
Ai thotë se Shën Petka iu shfaq sërish me buzëqeshje një ditë më vonë, kur mori një lajm të mrekullueshëm nga vajza e tij.
“Më 28 tetor, vajza më telefonoi dhe më tha se do të bëhesha gjysh përsëri. Ky do të jetë nipi ose mbesa ime e pestë, ndërsa për vajzën time është fëmija i tretë”, tha ai.
“Dëgjova një fëmijë që qante”
Duke kujtuar ngjarjen dramatike të 26 tetorit 2021, Vidoje tregoi se gjithçka mund të kishte përfunduar tragjikisht.
“Isha duke salduar një kornizë në oborr. Dëgjova një fëmijë që qante dhe thërriste nënën e tij, e cila ishte futur për pak çaste në shtëpi. Fëmija më i madh bërtiti se vëllai i tij kishte rënë në gropë. Vrapuam menjëherë. Nëna dhe një fqinje po përpiqeshin ta nxirrnin, por në sipërfaqe dilnin vetëm flluska. E kuptova se po fundosej”, kujton ai.
“Ishte i kaltër dhe pa shenja jete”
Sipas tij, gjithçka u vendos nga reagimi i shpejtë dhe gjakftohtësia.
“E kapa fëmijën dhe arrita ta nxirrja. Ishte i kaltër dhe pa asnjë shenjë jete. E mora në krahë. Beteja më e madhe ishte me mendimin: ‘Po sikur të mos ia dal?’ Fatmirësisht, kisha kryer kursin e ndihmës së parë dhe kjo më ndihmoi ta riktheja në jetë”, tha Vidoje.
Ai arriti t’i nxirrte ujin nga mushkëritë duke e kthyer fëmijën në anë, ndërsa më pas i masazhoi kraharorin dhe i dha frymëmarrje artificiale.
Pak çaste më vonë, djali tregoi shenja jete dhe shpërtheu në lot.
“Atëherë u ndjeva sikur më ngrohu dielli”, përfundoi heroi nga Dobanovci.
