Fifi flet hapur për konfliktet me kolegët: Nga hatërmbetjet në festivale te krisjet pas Big Brother VIP
Këngëtarja e njohur Fifi, e ftuar së fundmi në emisionin “The Dalina Show”, ka sqaruar publikisht disa nga konfliktet më të përfolura që ka pasur ndër vite me kolegë të saj në skenën artistike. Artistja foli hapur për marrëdhënie të prishura, keqkuptime dhe pajtime, duke dhënë versionin e saj për secilin rast.
Marrëdhënia e ftohtë me Mentor Hazirin
Një nga konfliktet që vazhdon prej vitesh është ai me këngëtarin Mentor Haziri. Fifi tregoi se raporti mes tyre është i ndërprerë dhe se aktualisht nuk komunikojnë, madje as në rast se takohen rastësisht.
Sipas saj, përplasja ka zanafillën në festivalin “Kënga Magjike”, ku Haziri i kishte dhënë 0 pikë këngës së saj “Marova”. Ajo kujtoi gjithashtu se edhe në vitin 2018, kënga “Psikopatja jote” ishte vlerësuar me vetëm 4 pikë dhe ishte kritikuar publikisht nga Haziri për performancë të dobët dhe stonatura.
“Po ta shihja dikur në rrugë, do shkoja t’i flisja, por ai do më thoshte se ne nuk flasim. Ai ka pasur diçka me mua, unë nuk e di saktësisht çfarë,” u shpreh Fifi.
Pajtimi me Anna Likën
Ndryshe nga raporti me Hazirin, Fifi konfirmoi se marrëdhënia me moderatoren Anna Lika është rregulluar. Ajo kujtoi një episod të viteve më parë, kur Lika kishte përdorur terma bullizues ndaj saj në një emision radiofonik.
Fifi tha se gjatë pajtimit ia kishte kërkuar shpjegimin për epitetet e përdorura, por gjithçka ishte sqaruar dhe sot ajo e konsideron këtë histori të mbyllur.
Bllokimi nga Arjola Demiri pas BBV
Raporti me aktoren Arjola Demiri, sipas Fifit, mbetet ende i ngrirë. Këngëtarja pranoi se Arjola e ka bllokuar në rrjetet sociale dhe se nuk kanë më komunikim.
Ajo dyshon se ftohja erdhi pas finales së “Big Brother VIP Albania 1”, kur Fifi doli hapur në mbështetje të Donald Veshajt. Sipas saj, kjo mund të ketë qenë arsyeja kryesore e krisjes së raportit mes tyre.
Incidenti me Donald Veshajn dhe sqarimi i situatës
Fifi foli edhe për incidentin me Donald Veshajn në emisionin “Më lër të flas”, ku ai vendosi lule në vendin ku ajo kishte humbur ndjenjat gjatë qëndrimit në BBV. Në atë kohë, këngëtarja kishte reaguar ashpër dhe kishte paralajmëruar edhe ndjekje ligjore.
Megjithatë, ajo sqaroi se situata është zgjidhur dhe se Donaldi i ka kërkuar falje, duke pranuar se nuk e kishte kuptuar se veprimi i tij ishte perceptuar negativisht.
