MPB ka njoftuar se më 11.12.2025, në ora 08:35, në SPB Manastir është raportuar një rast tragjik nga Reparti i Pediatrisë në Spitalin e Përgjithshëm të Prilepit, ku është sjellë një foshnjë tetëditëshe pa shenja jete.
Me urdhër të prokurorit publik, trupi i foshnjës është dërguar për autopsi, me qëllim që të përcaktohen shkaqet e sakta të vdekjes. Prokuroria ka theksuar se pas kryerjes së autopsisë pritet raporti i ekspertit mjekoligjor. Për rastin është njoftuar edhe Qendra për Punë Sociale në Prilep.
Sipas informatave të para, prindërit e kanë gjetur foshnjën pa shenja jete në mëngjes, kur janë zgjuar. Foshnja ishte fëmija i tretë i nënës, e cila ka edhe një fëmijë 17-muajsh dhe një tjetër trevjeçar.
Hetimet janë në vazhdim për të sqaruar rrethanat e plota të ngjarjes.
