Граѓански организации и активисти бараат итна дислокација на Цементарница „Усје“, за која сметаат дека е еден од клучните фактори за алармантната состојба со воздухот во Скопје, и најавуваат нов протест на 25 декември.
Според реакциите на терен, граѓаните велат дека „веќе не сакаат да чекаат“ и дека источниот дел на Скопје особено чувствува „гушење“ и магла како секојдневие. Во јавноста паралелно кружат и различни анализи за потеклото на загадувањето – летоска се посочуваше Вардариште, а во зима се зборува и за домашното греење.
И покрај тоа што, како што наведуваат, секојдневно/редовно излегуваат резултати од компанијата кои покажуваат дека фабриката не загадува, од иницијативи како „Зелен хуман град“ бараат итни и конкретни решенија, потенцирајќи дека проблемот се повторува секоја година, а состојбата станува сè позагрижувачка. Нивното барање е јасно: „Усје“ да се дислоцира.
Од друга страна, градоначалникот на Град Скопје, Орце Ѓорѓиевски, изјави дека градот ја информира јавноста со препораки за справување со загадувањето и дека инспекциите редовно постапуваат.
Од иницијативата ја поздравија и одлуката на градот да се откаже новогодишниот огномет за централната прослава, токму поради загадениот воздух. Дополнително, посочуваат дека веќе предложиле околу 30 мерки и бараат надлежните институции конечно сериозно да се зафатат со проблемот.
