Лидл важи за еден од најголемите синџири за продажба на храна во светот и вработува илјадници луѓе на различни позиции – од продавачи и благајници, до менаџери, консултанти и административен кадар. Но, колку навистина заработуваат вработените во овој малопродажен гигант?
Одговор на ова прашање нуди платформата Кунуну, каде што вработените анонимно ги оценуваат своите работодавачи и споделуваат информации за платите. Според податоците, најмногу внесени информации има за продавачи, менаџери на филијали и практиканти.
Според Кунуну, просечните бруто годишни плати во Лидл се движат од околу 14 илјади евра за практиканти, па сè до над 80 илјади евра за регионални менаџери. Продавачите и благајниците се меѓу најзастапените позиции, со плати во средниот опсег, додека менаџерските и консултантските позиции носат значително повисоки примања.
Сепак, важно е да се напомене дека станува збор за просечни вредности, а реалните плати може значително да варираат во зависност од колективниот договор, искуството и индивидуалните услови. Кај менаџерите на филијали, на пример, разликите се особено големи.
Лидл, според оценките на Кунуну, се издвојува и во споредба со конкуренцијата. Во категоријата „кариера и плата“ компанијата има повисок просек од повеќето други големи малопродажни синџири. Една од причините за тоа, според вработените, е и зголемувањето на платите за новите вработени, кое беше воведено во 2024 година.
Токму овие фактори ја позиционираат Лидл како еден од најпосакуваните работодавачи во малопродажниот сектор.
