Управата за финансиска полиција денеска достави известување до Основното обвинителство за гонење на организиран криминал за инвестиција од 2016 година. Станува збор за сознанија поврзани со трансакциите, движењето на парите за изградба на фабриката за вода „Маја“ близу селото Гари. Обвинителството истражува евентуално перење пари преку оф – шор фирми од Кипар и Британските Девствени Острови за реализација на инвестицијата. Се проверува и лице од Украина. Фирмата МЛ – Гари од Македонија се појави и во протечените „Пандора документи“.
Станува збор за милиони документи до кои стигнаа некои светски медиуми, а кои откриваат како светски лидери, милијардери и познати личности ги кријат своите пари и имоти преку даночни оази. Регионални и меѓународни медиуми за известување на организиран криминал и корупција веќе пишуваа дека зад наводната хрватската инвестиција во Гари всушност се кријат оф – шор фирми. Тие им припаѓале на лица кои тесно соработуваат со високи функционери од Русија кои се дел од најтесниот круг соработници на Путин. Инвестицијата кај нас ја промовираа ДУИ и Али Ахмети во 2016 година. Сторијата е заедничка на Алсат и на Истражувачката репортерска лабораторија – ИРЛ.