Премиерот Димитар Ковачевски денеска во 11 часот си поднесе оставка од функцијата.
Дописите се стигнати до Собранието, потврдија оттаму.
Во текот на денот, по Ковачевски, оставка треба да поднесе и претседателот на Собранието , Талат Џафери, кој според договорот на СДСМ и ДУИ, ќе го наследи претседателот на СДСМ- на премиерската функција.
Со овие оставки почнува формално-правната процедура за подготовка и избор на техничката Влада в недела на 28 јануари – 100 дена пред парламентарните избори што треба да се одржат на 8 мај, две недели пред претседателските избори.
Инаку, со оставката на премиерот, целата Влада преминува во оставка.
По оставката на премиерот Ковачевски од ВМРО ДПМНЕ упатија критики до кадрите на СДСМ и ДУИ.
-Адио Ковачевски, никогаш повторно на Македонија нема да и се случи да биде водена од Ковачевски или слични нему неспособни кадри, кои ја заглавија државата, донесоа сиромаштија и криминал, велат од ВМРО-ДПМНЕ.
Седницата за избор на Техничката влада ќе биде во недела.
На списокот на мандатарот ќе се најдат предлозите за министри и дополнителни заменици од партиите од власта, вклучувајќи и двајца министри и тројца заменици од ВМРО ДПМНЕ.
ВМРО-ДПМНЕ вчера на седница на Извршниот комитет ги утврди кандидатите за министри и дополнителни заменици министри.
Тимчо Муцунски потпретседател на партијата, по седницата на ИК потврди дека во преодната влада, Панче Тошковски ќе биде технички министер за внатрешни работи, а Ѓоко Велковски за труд и социјална политика. За дополнителен заменик– министер за финансиии е предложена Елена Петрова, за информатичко општество и администрација Стефан Андоновски, а за земјоделство, шумарство и водостопанство Цветан Трипуновски.
