Тимот американски истражители треба да почне најпрво од Владата, има многу корупција која може да се открие преку институциите како МВР, УЈП или Катастар без длабинска анализа- смета лидерот на ВМРО-ДПМНЕ Христијан Мицкоски.
Со актуелната владејачка структура, според него криминалот и корупцијата ќе се продлабочуваат, а единствено решение гледа во предвремени избори по кои тврди дека нема да има недопирливи функционери, а секој кој стекнал имот на нелегален начин ќе одговара.
По дилемите во јавноста дали овој американски тим ќе има и дипломатски притисок врз опозицијата за уставните измени, Мицкоски само потенцира дека пратеничката група на ВМРО-ДПМНЕ ќе остане обединета и нема да го смени ставот против бугарското барање.
Веста дека истражители од Вашингтон пристигнаа во Македонија да ловат корумпирани поранешни и актуелни функционери од сите политичари беше поздравена. Антикорупциската комисија оцени дека ова е пораз за Македонија, но и показател дека не сме ја завршиле нашата домашна задача. И од Кабинетот на шефот на државата за Канал 5 одговорија дека Пендаровски го поздравува ангажманот од САД, но потенцира дека справувањето со овој проблем треба да го решаваме преку нашите институции.
-Претседателот Пендаровски ја поддржува секоја иницијатива којашто ќе помогне во борбата против корупцијата, но смета дека тоа е обврска на нашите домашни институции. Претседателот поддржува “ветинг” како процес за сите актуелни функционери и притоа смета дека ангажманот на меѓународни експерти е добредојден, но сепак главната задача ќе треба да ја завршат нашите домашни институции. – велат од кабинетот на Пендаровски.
Во меѓувреме за следната недела е најавена посета на високи американски дипломати во земјава. В среда во Скопје доаѓа Дерек Шоле, советникот на државниот секретар на САД на средба со владини претставници, а една од темите ќе биде токму борбата против корупцијата. Во делегацијата со него се очекува да пристигне и специјалниот претставник за Западен Балкан, Габриел Ескобар.
