Чад се крева по израелскиот воздушен напад врз јужното либанско село Киам во близина на границата со Израел
Четири лица се ранети откако граната експлодирала во близина на патрола на Обединетите Нации во јужен Либан, соопшти мировната мисија на ОН.
Мировната мисија на ОН во јужен Либан, УНИФИЛ, соопшти дека тројца воени набљудувачи и еден либански преведувач биле повредени во експлозија во близина на нивната локација, за време на пешачка патрола долж Сината линија што ја дели границата меѓу Либан и Израел.
Се наведува дека тие се евакуирани за медицинска помош и се истражува потеклото на експлозијата.
Претходно, Ројтерс објави дека израелски напад удрил во автомобил со набљудувачи на ОН пред пограничниот град Рмеиша, повикувајќи се на два безбедносни извори.
Меѓутоа, израелската армија изјави дека, „наспроти информациите“, не погодила во возило УНИФИЛ во областа.
Најмалку седум загинати во израелскиот напад врз јужен Либан
Израел разменува оган со либанската вооружена група Хезболах во јужен Либан речиси шест месеци паралелно со војната во Газа.
Во израелското гранатирање на Либан, според властите, досега се убиени речиси 270 борци на Хезболах, но загинале и околу 50 цивили – вклучувајќи деца, болничари и новинари, а погодени се и УНИФИЛ и либанската армија.
Во ноември 2023 година, УНИФИЛ објави дека една од нејзините патроли била погодена од израелски оган во јужен Либан, но немало жртви.
УНИФИЛ минатиот месец соопшти дека израелската војска го прекршила меѓународното право пукајќи врз група јасно означени новинари, убивајќи новинар на Ројтерс.
