Собранискиот спикер не гледа проблем во тоа што син му е на чекор да стане обвинител и покрај аферата во која Антикорупциската комисија откри дека предвреме полагал правосуден испит. Барлет Џафери е најспорното име на списокот на лица кои ја завршиле Академијата за судии и јавни обвинители, на кој може да се најдат и имиња на блиски роднини на функционери, актуелни и поранешни обвинители и судии, најмногу поради тоа што успеа да влезе во академијата без да ги исполни условите, а сега ќе биде во позиција и самиот да истражува криминал.
Истрагата на антикорупционерите за случајот со синот на Џафери беше проширена, но не доби епилог, што за неговиот татко е доказ нека тука нема ништо спорно.
За опозициската ВМРО-ДПМНЕ ова е преседан од невиден размер и ги повикаа сите надлежни институции да реагираат.
На списокот за јавни обвинители и судии се најдоа и сопруги и снаи на политичари и судии. Меѓу нив е и сопругата на шефот на обвинителството за организиран криминал, Ислам Абази, снаата на генералниот секретар на Собранието, Цветанка Иванова, сопругата на градоначалникот на Аеродром, Тимчо Муцунски, ќерката на пензионираната обвинителка Гордана Смаќоска. Иден судија ќе биде и синот на заменичката на Катица Јанева, обвинителката Елизабета Јосифовска. Синот на судијата од скопска Апелација, Енвер Беџети, пак, ќе биде јавен обвинител.
