Едно од три деца на возраст под две години е акутно неухрането и изложено на ризик од глад во северниот дел на Газа, објави главната агенција на Обединетите нации која работи на палестинската територија.
„Детската неухранетост брзо се шири и достигнува невидени нивоа во Газа“, соопшти Агенцијата на ОН за помош и работа за палестинските бегалци (УНРВА).
Поминаа повеќе од пет месеци од почетокот на израелските воздушни и копнени напади во Газа, предизвикани од напад на Хамас, кој САД и ЕУ го означуваат како терористичка организација. Поголемиот дел од областа е во урнатини, а повеќето од 2,3 милиони жители се раселени и се соочуваат со голема хуманитарна криза.
Според болниците во Газа, децата умираат од неухранетост и дехидрација.
Западните земји го повикаа Израел да направи повеќе за да дозволи помош, а ОН велат дека се соочуваат со „големи пречки“, вклучително и затворање на премините, тешка проверка, ограничувања на движењето и немири во Газа.
Израел вели дека не ја ограничува хуманитарната помош за цивилите во Газа и ја обвинува бавната испорака на помош во неспособноста или неефикасноста на агенциите на Обединетите нации.
Доставувањето на помош за Газа по воздушен и морски пат започна, но хуманитарните агенции велат дека тоа не е замена за испораката на залихи по копно. Првата пратка по морски пат преку Кипар пристигна во четвртокот.
Израел ја обвини УНРВА за соработка со екстремистичкиот Хамас, велејќи дека некои членови на персоналот учествувале во нападот на 7 октомври и побарал агенцијата да се распушти. Неколку земји престанаа да финансираат поради овие наводи.
УНРВА негира соучесништво со Хамас и во февруари соопшти дека отпуштила 12 од своите 13.000 вработени во Газа набргу откако Израел ги обвини за вмешаност.
