Министерството за образование и наука соопшти денеска дека студентските домови не можат самите да ја променат цената за сместување, како и дека нема да дозволи зголемување на цените „преку самоволие и непочитување на прописите“, реагирајќи на вчерашната објава на организацијата Студентски отпор дека се зголемени месечните кирии во студентските домови.
МОН потенцира дека ниту еден студентски дом индивидуално не може да ја промени цената за сместување и на студентите избрани преку јавно објавени конкурси да им наплатува различен износ од утврдениот во Програмата.
„Доколку се утврди постапување спротивно на важечките акти, Министерството најавува дека ќе побара одговорност од директорите кои го направиле прекршувањето“, велат од МОН.
Од таму потсетуваат дека согласно со Законот за студентски стандард, цената за сместување во државни студентски домови се утврдува со Програма за остварување и развој во дејноста на студентскиот стандард, која ја усвојува Владата. Притоа, стои во соопштението, МОН покрива 50 проценти од вкупниот износ на цената, која за 2023 година изнесува 6820 денари.
Извор: https://nezavisen.mk/studentskite-domovi-ne-mozhat-individualno-da-ja-promena-cenata-za-smestuvanje-velat-od-mon/
