Кога се зборува за намалување на крвниот притисок преку исхрана, најчесто прво се спомнува солта. Од Американската асоцијација за срце посочуваат дека намалување на внесот на натриум за околу 1.000 милиграми дневно може значително да помогне во контролата на притисокот. Но, според кардиолози и нутриционисти, проблемот не е само во солената храна.
– Солта е само дел од приказната. И одредени пијалоци можат да влијаат и да го покачат крвниот притисок, вели диететичарот Мишел Д. Рагер. Здравствените експерти издвојуваат еден многу чест пијалок кој може да предизвика понагло покачување – енергетските пијалоци.
– Енергетските пијалоци можат да доведат до нагло зголемување на крвниот притисок поради тоа како нивните состојки го стимулираат кардиоваскуларниот систем, објаснува диететичарката и нутриционистка Мишел Рутенштајн.
Кардиологот д-р Ренди Гулд појаснува дека клучен фактор е кофеинот: тој го поттикнува ослободувањето на епинефрин (адреналин), што може да предизвика скок на притисокот, а ефектот често достигнува врв во рок од околу еден час.
Освен кофеин, енергетските пијалоци често содржат и други стимуланси. Рагер укажува дека гуарана е дополнителен извор на кофеин, па реалната количина на стимуланс може да биде поголема отколку што на прв поглед изгледа според декларацијата.
Експертите нагласуваат и дека покачениот притисок не мора да има јасни симптоми. Рутенштајн предупредува на таканаречени „тивки скокови“, особено кај луѓе кои редовно внесуваат кофеин и не забележуваат веднаш промени.
Кардиологот д-р Ченг-Хан Чен вели дека повремено консумирање веројатно нема да остави долгорочни последици, но честото пиење енергетски пијалоци може да го зголеми ризикот од хипертензија и нарушувања на срцевиот ритам.
